ტარიელ ჭანტურია - მებაღის სიყვარული

გავყიდი მიხაკს. მიხაკის ფასად
ვიყიდი ვარდებს. ვარდების ფასად
ვიყიდი იებს. იების ფასად
იების ფასად - გიყიდი შენ!

წაგიყვან ბაღში, ხოლო ბაღიდან
წაგიყვან სახლში, ხოლო სახლიდან
აგიყვან ცაში, აგიყვან ცაში -
ერთად ვიცხოვრებთ ღრუბლებში ჩვენ!

ცისარტყელები გვექნება სიმად!
დაველოდებით ამინდებს კვიმატს,
და ღრუბლებიდან წამოვალთ წვიმად-
დავაწვიმდებით მიხაკებს ჩვენ!

ხოლო ნაწვიმარ მიხაკის ფასად
ვიყიდით ვარდებს! და იმის ფასად
ვიყიდით იებს! და იმის ფასად

იების გოგოს ვიყიდით ჩვენ!
იების ბიჭსაც ვიყიდით ჩვენ!..

ტარიელ ჭანტურია - შოთა რუსთაველი

ყოველ ქართველში შენი გენია,
მარად ცოცხალი გენი...
ყოველ ქართველში სული, გენია
და ღიმილია შენი.

სისულელეა - შენს ტვირთს რა ასწევს...
მხრით შენ იმაგრებ ამ თაღს,
და უერთდება ცისფერ რვაას წელს
უსასრულობა ჟამთა...

ხმალს არ ეღირსა შენსას ჩაგება!
როგორ ჩაგეგო, ანკი...
ჟღერენ მსოფლიოს დიდი ჩანგები,
მეფედ - შენია ჩანგი!

მგონია, ჩემშიც შენი გენია,
მარად ცოცხალი გენი...
ყოველ ქართველში სული, გენია
და ღიმილია შენი!..

ტარიელ ჭანტურია - "შენ უნდა ცისფერ ღრუბელთან იწვე"

შენ უნდა ცისფერ ღრუბელთან იწვე,
უნდა ღრუბელი გეფინოს ლურჯი.
მე შენს მეუღლეს დუელში ვიწვევ,
რომ ჩავახედო შენს კეთილ სულში.

შენ უნდა უცხოდ მოსული ქარი
გიფრიალებდეს ნისლისფერ მერდინს,
გაიღოს უცებ სამოთხის კარი-
მუხლებთან გეჯდეს შემკრთალი ღმერთი...

რა ჯობს-სიმღერა თუ წყვილი ცრემლი!
სად ჯობს- მიწაზე თუ მიწის გარეთ!..
მზე-მზეზე უფრო დიდი და ცხელი,
მთვარე-მთვარეზეც მაღალი მთვარე,

ტარიელ ჭანტურია - ავტომატის ჯერი

საცოდავი ჩიტი-
ჩიტი. ჩიტმა. ჩიტს...
ავტომატის მჭიდი-
მჭიდი. მჭიდმა. მჭიდს...
ბოლოს ჩახმახისთვის,
ჩახმახისთვის, ჭახ...
გამოკრული თითი-
თითი. თითმა. თითს...

ტარიელ ჭანტურია - არის თუ არა სიცოცხლე მარსზე

”არის თუ არა სიცოცხლე მარსზე!”
“არის თუ არა იქ სადმე წყალი!”
სიცოცხლე მარსზე იქნება მაშინ,
როდესაც მარსზე იქნება... ქალი.

კარგია, როცა ტელესკოპებით
აკვირდებიან უცნაურ არხებს...
მაგრამ სიცოცხლე ის არის, როცა
კაბის ბოლოების ნიავი არხევს...

ღვთისმშობლის მადლი... თამარის სახე...
ღიმილი ფრესკის... მადონა სიქსტის...
ცუდია, თუკი მარსის მინდვრებზე
ჯერ არ უვლია კარდაკარ სიკვდილს...

ტარიელ ჭანტურია - ცეკვა კაფე "ამბასადორში"

ტვისტი და ტვისტი, ჰალი - გალი!
ფიცი და ფიცი. ქალი. ქალი.
ბიჭი და ბიჭი. ქალი. ქალი.
როკი და როკი. ჰალი _ გალი!

ხომ არ გეშინია?
მეშინია!
რატომ გეშინია?
მეშინია!

-კიდევ გეშინია?
-მეშინია!
-გესმის? გერშვინია!
-გერშვინია.

ტარიელ ჭანტურია - უხერხულია შენ გერქვას ცოლი

შენ უნდა ცისფერ ღრუბელთან იწვე,
უნდა ღრუბელი გეფინოს ლურჯი.
მე შენს მეუღლეს დუელში ვიწვევ,
რომ ჩავახედო შენს კეთილ სულში.

შენ უნდა უცხოდ მოსული ქარი
გიფრიალებდეს ნისლისფერ მერდინს,
გაიღოს უცებ სამოთხის კარი-
მუხლებთან გეჯდეს შემკრთალი ღმერთი...

რა ჯობს-სიმღერა თუ წყვილი ცრემლი!
სად ჯობს- მიწაზე თუ მიწის გარეთ!..
მზე-მზეზე უფრო დიდი და ცხელი,
მთვარე-მთვარეზეც მაღალი მთვარე.