მურმან ლებანიძე - დილის ბინდში ვერის ხიდზე მოვხვდით

დილის ბინდში ვერის ხიდზე მოვხვდით,
თოვდა, თოვდა... რა კარგია თოვა...
გადამიდგა და ბოდიშის მოხდით
გამაჩერა,სიგარეტი მთხოვა...

მივაწოდე, - გაიხარა კაცმა,
მოვუკიდეთ, - მთვრალი ვარო მითხრა,
გავაბოლეთ, - გულის ფსკერზე დათბა,
სთქვა მადლობა,რა დროაო, მკითხა...

მე ვუთხარი, - ხუთი იყო დილის,
ხიდზე დავრჩი, ის გავიდა გაღმა,
"ეჰეჰეი!" - შეუძახა თბილისს და ღიღინით
ვერის აღმართს აჰყვა...

თოვდა, თოვდა, სიგარეტი გვქონდა,
თოვდა, თოვდა... რა კარგია თოვა...
რა კარგია, რა ბევრი და ცოტა -
თოვლში კაცმა სიგარეტი მთხოვა!

Murman Lebanidze - Dilis Bindshi Veris Xidze Movxvdit
მურმან ლებანიძე - დილის ბინდში ვერის ხიდზე მოვხვდით