აღარც - ბრძოლა,
აღარც - ქროლა,
აღარც შეძახება მწადის -
თვალი ესიყვარულება
წვეროკინას
ჭადრის...
მზე მოსტოპავს
ცისფერ ტატნობს,
კაცი - გაღმა ვენახს ხარდნის -
როგორც უნდა
ისე ხარდნოს,
მე -
სიჩუმე
მწადის!
აღარც - დევის ქალი ცოლად!
აღარც -
სკიპტრა ზღვიდან ზღვამდის!
ხელმწიფობა კი არა და,
აღარც -
რუსთაველობა მწადის!
მზე ამოდის
და მზე ჩადის,
ვნატრობ, - ძველებურად მწვავდეს,
თვალი ესიყვარულება
წვეროკინას
ჭადრის.
Murman Lebanidze - Agarc - Brdzola
მურმან ლებანიძე - აღარც - ბრძოლა
No comments:
Post a Comment