თორნიკე ნაროზაული - ვარ სხვანაირი ფერის თვალება

ვარ,
სხვანაირი ფერის თვალება,
უბრალო ბიჭი, შავი სამოსით,
და რადგან ჩემი ფერისცვალება
ღმერთმა ინება, სასაფლაოსი
კარი უთუოდ უნდა გაიღოს,
და დამარხული აღსდგეს მკვდრეთიდან
საბრალო სული. მიწამ წაიღოს
სხვა დანარჩენი, რადგან ვერ ვიტან
სიმყრალით მოსილ სურნელს სამანის,
წყვდიადით მალულ სინათლის სხივებს,
რომ ჩამიბნელეს ვიწრო სავალი,
რომ მიმატოვეს, არ მომისმინეს...

ვარ,
სხვანაირი ფერის თვალება,
რადგან თვალებში ქრისტე მარხია,
სულზე ჩოქვით რომ გადაიარა,
შენზე ფიქრით რომ შეიცვარება,
ჩემი თვალები სფერო კი არა,
ჩემი თვალები - შენი სახლია!


tornike narozauli - var sxvanairi feris tvaleba